'ANG UMAAPOY NA KAMBING SA LUYANG' ( The Blazing Goat in Luyang)

Patuloy na maglalahad ang blog na ito ng mga kataka-takang pangyayari sa ating daigdig, na hinango sa salaysay ng mga ating nakapanayam. Ating ilalahad naman ngayon ang karanasan ni Mr. Rosal Tanyo ng Albay, isang securiry guard sa The One Executive Building sa Delta Lungsod ng Quezon.

Kuwento ni Rosal, noong siya ay 16-anyos, nagtungo ang kanyang pamilya sa Catanduanes. Nang magawi sila  malapit sa Luyang Cave, na matatagpuan sa San Andres ( dating Cabolbon) sa bayan ng Virac, nagpasama si Rosal sa mga taga-roon na tinatawag na Binanhawahan upang mamasyal. Ang tunay na pakay ng binatilyo noon na si Rosal ay maghanap ng ibon gaya ng tarat at gagamba upang alagaan. 

Nang ihatid ng isang Binanhawahan malapit sa kuweba, naghanap doon si Rosal sa mga tatalhiban at mga damuhan ng gagambang bulik. Dahil sa nawili sa pamamasyal, inabot ang binatilyo ng takipsilim. Bandang alas sais ng gabi, nakakita si Rosal ng isang kambing na kulay itim na lumabas mula sa yungib. 

Nagtaka siya kung bakit nagkaroon doon ng kambing. Dala ng kuryusidad, sinundan niya ang kambing dahil sa pag-aakalang naliligaw ito o napawalay sa kawan. Maliksi at mailap ang kambing. nang magawei ang kambing sa madilim na bahagi sa kakahuyan, biglang nakakita si Rosal ng isang santilmo at bumagsak malapit sa kinaroroonan ng kambing. Laking gulat na lamang ng binatilyo nang makitang tumatakbo ang kambing na nagliliyab pero di ito napapaso. 

"Parang dagundong ng kulog ang yabag ng kambing na iyon--- na habang papalayo sa aking paningin ay lalong lumalaki. Sa tantiya ko, lumaki ang kambing na iyon hanggang 8 talampakan sa pagkakatayo at nakita kong pumasok ito sa isang butas o hole na umaapoy din sa palibot. Bagama't nawili ako at namangha, kinilabutan ako pagkatapos nun dahil noong ikinuwento ko iyon sa aking mga kaanak, wala umano silang nakitang ganung kambing--- ni kahit ang mga taga- Binanhawahan," pahayag ni Rosal. 

Ngayon, ano ang paliwanag dito ng mga matatandang taga-Binanhawahan sa nakita ni Rosal? Ano ang bumabalot na misteryo tungkol sa umaapoy na kambing na sabi ng ilan doon ay namamataan noon pang ika-18 siglo? Bagama't iginiit ni Rosal na talagang umaapoy na kambing ang kanyang nakita, may paliwanag naman dito ang tubong taga- San Andres na si Ginoong Armando Maluoy, 74-anyos kung bakit nakakakita ang iba ngnaturang hayop. Aniya sa isang panayam,

"Walang misteryo tungkol sa umaapoy na kambing. Kung meron man, tao rin ang may gawa. Noong 14-anyos ako, may isang ritwal sa aming barangay na kapag may kaarawan ang isang matanda na lumagpas na saedad na 84-anyos, kinaugalian na magkatay ng kambing upang lutuin. Bago katayain ang isang kambing, bubuhusan ito ng gasolina o gas at sisindihan. Kung kaya, nagliliyab na ang kambing na tumatakbo. May abay o tumitingin dito kung saan pupunta. Sa gayun, kapag nalagutan na ng hininga, makukuhang muli angkambing at tuluyan nang lilitsunin."

"Ginagawa ito sa paniniwala ng mga taga-Banhawahan na ito ay nagtataboy ng masasamang espiritu at binibigyan ng proteksiyon ang magdaraos ng kaarawan. Gayunman, noong dekada 70, itinigil na ang ganitong kakatwang ritwal dahil sa masaklap na kinasasapitan ng kambing--- na nagbibigay sa iba ng impresyon namay gayun ngang nilalang. Inaakala pa nga ng iba na ito ay isang premonisyon ng masamang espiritu. Kung may nakita man si Rosal na gayun, gaya ng kanyang inilahad noong Abril 1996, baka may nagtrip lang na magsagawa ng gayung ritwal at napadpad lang ang kambing sa kuweba ng Luyang, kung kaya nakita ito ng binatilyo noon na si Rosal."

"Ang ritwal ng umaapoy na kambing ay bawal na. Kung meron man, ginagawa ito sa liblib na lugar upang walang makakita. Kung minsan, ginagawa ito ng iba upang protektahan ang kuweba laban sa mga nagkakalat at nagsasagawa ng kalokohan malapit sa kuweba lalo na ang mga dayo," dugtong pa ni Manong Arman.